Bola.. Bola... Bola...

Hanyo dengan menggunokan hujung ibu jari kaki den menyepak bola.. itulah kali pertamo den meraso menondang bola dan kali pertamo meraso betapo ibu jari kaki den sakit bilo menondang bola.. caro sepakan tu dikonali sebagai "tonjol". tanpo menggunokan kasut hanyo berkaki ayam den dengan kawan-kawan yang lain pun bermainlah bola setiap potang. dari tak reti menyepak sampai lah buleh mengelecek... takdo la terer bona doh cumo buleh lah sikit-sikit.

Tapi malang eh den mulo aktif menyertai pasukan bolasepak selopeh abih sekolah, time sekolah bukan den tak nak main tapi jarak antaro sekolah dengan rumah yang begitu jauh dan tiada transport untuk den balik kalau ado latihan waktu potang. Mulo-mulo den sertai pasukan kampung den yang masuk liga kek Kualo Pilah. Itu lah pengalaman pertamo den sebagai pemain bolasepak. Den diberi tugas benteng sebolah kanan, game tersebut den berjayo membuekan striker lawan diusung keluar. sejak tu namo den terus tersenarai dalam kesebelasan utamo team. Dalam tahun tu jugak (1994) den dapek tawaran main untuk daerah Kuala Pilah dalam Piala Tuanku yang akan disertai oleh daerah yang ado kek Negeri Sembilan. Den diberi tugas menjago pertahanan sebolah kiri, Alhamdulillah maso tu jadi Johan..

Den jugo buleh bermain diposisi penjaga gol, ponah menang pertandingan 7 sebolah ketiko den menjadi penjaga gol nih... dan ponah menjadi naib juara bahagian kuala pilah dalam pertandingan peringkat dun. Tapi den tak suko bona menjadi penjaga gol ni doh.. raso tak pueh tengok orang berlari-lari kojar bola den pulak tercongok ajo dopan pintu gol.

Kecederaan yang paling teruk den raso time den menjadi pemain bola ialah time ankle injured dan kepalo den kono jahit sobab kono lastik dokek penyokong lawan... hahahhaha.. gilo kan.. sampai kono lastik den,, nasib la tak bosa mano luko eh cumo dapek 3 jahitan sahajo..

Zaman sebelum berakhir eh den menjadi pemain bola maso den main kek Liga Jelebu sebagai pemain import.. hahahahha... dapek bayaran laie tu... maso tu den menjadi striker... dapek jugak la lotak namo sebagai penjaring gol... selopeh tu den pindah ke Kuala Lumpur.. takdo laie dah main bola dan borek badan den pun naik...